ТРК кафиллиги билан кредит олиш осонлашяптими? “Тадбиркорликни ривожлантириш компанияси” тижорат банклари орқали кафиллик асосида қўллаб-қувватланган тадбиркорлар бўйича навбатдаги маълумотларни эълон қилди. Кузатув шуни кўрсатадики, айнан шу механизм гаров етишмагани сабаб кредит олишда қийналаётган тадбиркорлар учун реал ечим бўлиб хизмат қилмоқда. Маълумот ўрнида: Эндиликда тижорат банклари учун кафиллик билан бериладиган кредитлар янада қулайлашган. Банклар капиталининг монандлигига қўйиладиган талаблар тўғрисидаги Низомга (Ўзбекистон Республикаси Адлия вазирлиги томонидан 2025 йил 11 августда 3697-сон билан рўйхатга олинган) мувофиқ, тижорат банклари орқали тадбиркорлик субъектларига 15 млрд сўмгача берилган кредитлар бўйича кафолатлар бериш ташкилотининг кафолати (кафиллиги) билан таъминланган тижорат банклари активларининг таваккалчилик даражаси 50 фоиз этиб белгиланади. Мазкур механизм банкларнинг капитал етарлилиги кўрсаткичининг яхшиланишига хизмат қилади. Натижада банкларнинг кредитлаш қобилияти ошади, тадбиркорлик субъектлари учун эса янада кенгроқ имкониятлар яратилди. Кафиллик хизмати TRK компаниялар гуруҳи таркибига кирувчи “Бизнесни кафолатлаш миллий компанияси” томонидан тақдим этилади.