Тадбиркорликни ривожлантириш компанияси бизнесни тўғридан-тўғри молиялаштиришни бошлади Компания молиявий инструментларни мустақил жорий қилиш ҳуқуқидан фойдаланган ҳолда, тадбиркорлар учун янги қулай хизматларни жорий қилишда давом этмоқда. Эътиборлиси, таклифлар айни вақтда бозорга қараганда анча-мунча мақбулроқ шартларда. Кечадан бошлаб компания 20 млрд сўмгача бўлган миқдорда қарзларни йиллик 17,5% устама билан беришни бошлаган. Яна бир муҳим жиҳат — бу шунчаки тадбиркорликни ривожлантириш учун маблағ ажратиш эмас, аввал текширилган, самарали, эртаси бор лойиҳаларни молиялаштириш орқали Ўзбекистондаги бизнес муҳитни янада ривожлантириш учун инвестиция киритиш демак. Айнан шунинг учун ҳам қарзни олиш шартлари бирмунча қатъийроқ. Масалан 15 та иш ўрни яратган ва йиллик даромади 6 млрд сўмдан кўп кичик тадбиркорлар 5 млрд сўмгача, 25-50 та иш ўрни яратган ўрта бизнес эгалари эса, 5 млрд сўмдан 20 млрд сўмгача ёрдам ола билади. Олинган маблағларни кўчмас мулк, асбоб-ускуна ёки айланма маблағларни тўлдириш учун сарфлаш мумкин. Ушбу ёрдамдан фойдаланиш бўйича биринчи очиқ танлов бошланиб бўлган. Мазкур инструмент олдин жорий қилинган хизматлар — "Хизматлар ипотекаси" ва "Улуш киритиш"дан кейинги молиявий ресурслар бозорида оммабоп маҳсулот бўлишини кутиш мумкин.