"Нефть дарё бўлиб оқаверсин!" Кеча тунда АҚШ ва Эрон ўртасида тинчлик келишувларига эришилган. Жума, 19 июнь куни томонлар Швейцарияда меморандум имзолашади. Эришилган компромисслар Ҳўрмуз бўғозининг очилиши, барча йўналишларда, хусусан Ливанда ҳам урушнинг тўхтатилишини англатади. Қолган — Эроннинг ядровий дастуридан тортиб, санкцияларгача бўлган баҳсли масалалар босқичма-босқич ечилишига умид билдирилмоқда. Нима бўлгандаям, битимга эришилганини ҳар икки томон тасдиқлаган ва бу эрталабдан бозорларга жуда яхши таъсир этмоқда. Нефть 83 долларгача арзонлаган (ўтган ҳафта бошидаги 98, жума кунги 90 доллардан). 4 000 долларгача тушиб кетган олтин яна 4 300 доллардан кўтарилди. Хатарлар ариб, ғазначилик облигациялари даромадлилиги тушмоқда.