Кеча Ипотека-банк қиймати 300 млн. АҚШ долларига тенг бўлган 5 йиллик халқаро облигацияларини хорижий инвесторларга сотди. Халқаро облигацияларнинг дебют эмиссияси J.P. Morgan (АҚШ), Raiffeisen Bank International AG (Австрия), MUFG (Япония) ва Societe Generale (Франция) каби халқаро миқёсда тан олинган андеррайтинг банклари тавсиялари асосида амалга оширилгани айтилмоқда. Бошланғич фоиз ставкаси 5,625% этиб белгиланган халқаро облигацияларнинг якуний фоиз ставкаси ва купон қарийб 0,125% бирликка туширилиб, 5,50% этиб белгиланди. Халқаро облигациялар Буюк Британия (27%), Швейцария (22%), Германия (18%), АҚШ (11%) ва бошқа бир қатор Европа ва Осиё (22%) давлатларининг инвесторлари орасида тақсимланди. Банкнинг ёзишича, халқаро облигацияларни жойлаштиришдан тушган маблағларнинг Ўзбекистон ривожига ҳисса қўшадиган инвестицион лойиҳаларни молиялаштиришга, шунингдек тадбиркорликни қўллаб-қувватлаш мақсадларига йўналтирилар экан.