2021 йил кутилмалари. Иқтисодиёт. Давоми Инвесторлар ҳаддан ташқари тез ўсаётган восита ва активлардан ўзларини тийишига тўғри келади. Адекват даромадликни таъминлаш билан активлар қийматини сақлаб қолиш йўлини тутганлар ва узоқ муддатли мажбуриятларни миллий валютада шакллантириш амалиётини қўллаганлар кўпроқ ютуқда бўлади. Давлат лавозими ва ваколатлари бойлик орттиришнинг энг асосий воситаси сифатида сақланиб қолади. Ўзбек номенклатурасининг лояллигини таъминлаш мақсадида кун тартибига чиқадиган суриштирув ва сиздиргиларга бефарқ муносабат ва деградация давом этади. Ташқи фасад учун шаклланган антикоррупцион восита ва институтлар фалаж ҳолатда қолади. Вақти вақти билан импортни чеклаш бўйича чақириқлар янглаб тураверади. Лекин "маҳаллийлаштириш" байроғи остида импортнинг экспортдан кўра юқори суръатларда ошишини тўхтатиб бўлмайди. "Маҳаллийлаштириш" аслида қимматлаштирилган импорт ва маблағларнинг ўзлаштириш пирамидаси экани тушуниб етилади, лекин бу пайтда сайлов кампанияси бошланган бўлади. Макроиқтисодий параметрларнинг, улар туб иқтисодий асосларга эга бўлмагани ва хаотик қарорлар билан мувозанат издан чиқариб борилиши сабабли, мўлжалланган кўрсаткичларга чиқиши қийинлаша боради, натижада кўрсаткичларнинг келишув асосида шаклан таъминланишига қайта қўл урилади. Мамлакатга авторитар иқтисодий қоидалар орқали бошқарув усуллари қайтади. @the_bankiroff