Банкирларни ўзгартираётган эътиқод ва трансформация ҳақида Кейинги пайтда эътиқоди ва виждон танлови сабаб шоу бизнес ва санъат соҳасидаги фаолиятини тўхтатиб, бошқа йўлни тутаётган ватандошларимиз ҳақида кўп эшитаяпмиз. Бунга турлича баҳо бериш мумкин. Нима бўлгандаям, кимнинг қандай ҳаёт кечириши ва эътиқоди масаласи мутлақо шахсий иш ҳисобланади. Шу ўринда ўтган 2020 йилда, айниқса унинг охирида жуда кўп банк ходимлари банк ишини ташлаб кетиши кузатилгани ёдга тушади. Чунки эътиқод ва танлов сабабли юз бераётган қарорлар айниқса эсда қолади. Айтиш керакки, собиқ банкирлар банкдан кетгач, қийналиб қолгани ёки ижтимоий ўрни йўқолиб кетишини кам учратасиз. Чунки уларнинг аксари бирга ишлаган муваффақиятли мижозларининг бизнес тажрибалари ва андозаларини кейинги фаолиятлари учун ўзлаштириб олишади ва бундан кенг фойдаланишади. Аксар бизнес кишиларидан фарқли ўлароқ, собиқ банкирлар мижозларнинг нафақат ютуқларидан андоза олишади, уларнинг мағлубиятлари ва хатоларидан ҳам керакли хулоса чиқаришади. Технологик ўзгаришлар ва банкларнинг трансформацияси оқибати ўлароқ юз берадиган ёппасига қисқартиришлар масаласи эса сал бошқачароқ. Бу мавзуга кейинроқ алоҳида тўхтатилишга тўғри келади. Умуман олганда, бугунги банкирлар сунъий интеллект ва технологияларнинг имкониятлари яқин истиқболда уларнинг аксарияти иш фаолияти ва бандлигига бевосита таъсир этадиган асосий омил эканини қабул қилишлари керак бўлади. @the_bankiroff