Шаффофлик томон яна бир қадам Айтишларича, Марказий банк томонидан ички валюта бозорида амалга ошириладиган валюта интервенцияларининг шаффофлигини таъминлаш мақсадларида, маҳаллий ишлаб чиқарувчилардан монетар олтин харид қилиниши натижасида юзага келган ликвидлиликни стерилизация қилишга йўналтирилган интервенцияларнинг ойлик ҳажми эълон қилиб борилиши режалаштирилмоқда. Маълумки, Ўзбекистонда олтин ишлаб чиқарувчилардан олтинни фақат Марказий банк сотиб олади, олтин сотиб олинган ойларда пул массаси сезиларли даражада кўпаяди. Масалан, айни дамда пул массаси 100-110 трлн.сўм атрофида, шартли 15 тонна олтин сотиб олиниши, пул массасини бирданига 9-10 трлн.сўмга ошириб юборади. Агар валюта интервенцияси орқали ушбу пул массаси стерилизацияси амалга оширилмайдиган бўлса, жиддий инфляцион омиллар пайдо бўлади. Шу кунгача Марказий банк қанча олтин сотиб олгани ва қанча интервенция амалга оширгани тўғрисидаги маълумотлар анча вақт оралиғидан сўнг, чораклик ва йиллик кўринишда очиқланарди. Табиийки, қайси ойда қанча олтин сотилгани ва қайси ойда қанча интервенция амалга оширилгани тўғрисидаги маълумотсиз ички бозорда курс ўзгаришлари тенденцияларини ташқаридан туриб баҳолаш имконсиз эди. @the_bankiroff