​Тезроқ, фақат тезроқ «Лотин ёзувига асосланган ўзбек алифбосини жорий этиш тўғрисида»ги Қонунига ўзгартиришлар киритиш ҳақида»ги Қонун лойиҳаси ниҳоят эълон қилинди. Ўтган эпохада, токи 1993 йилдан кейин туғилган ўзбекистонлик давлат раҳбари бўлмагунча, Лотин ёзувига ўтилмайди, деган ҳазиломуз луқма юрарди. Лотин ёзувига асосланган алифбога ўтишнинг 28 йиллик эпопеясига ниҳоят нуқта қўйиладиган кўринади. Ҳозир нега ундоқ, нега тепасида чизиқ, иккита нуқта эмас, юмшоқ Ҳ, қаттиқ Х керакми, каби тортишувларга яна йиллар сарфлашган ҳаққимиз йўқ. Ўтволайлик узил-кесил, кейин шошилмай, муҳокамаларни давом эттираверамиз. Албатта, менда аниқ статистика йўқ, лекин Лотин ёзувига ўтиш тўғрисида қарор қабул қилинган буён туғилганлар сони ҳозир унгача туғилганлар сонидан кам эмас. Ижтимоий фаоллик нуқтаи назаридан эса каррасига кўп.