Ҳар октябрда шу бўлар такрор «Лотин ёзувига асосланган ўзбек алифбосини жорий этиш тўғрисида»ги қонун қабул қилинганига 27 йилдан ошди. Ўзбекистон Республикаси Олий Кенгаши қарорига кўра, 2010 йилнинг 1 сентябридан эътиборан 1940 йил 8 майда қабул қилинган «Ўзбек ёзувини лотинлаштирилган алифбедан рус графикаси асосидаги янги ўзбек алифбесига кўчириш тўғрисида»ги Ўзбекистон Республикасининг Қонуни ўз кучини йўқотиши белгиланган. Яъни, 10 йили 40 кундан буён биз кирилл алифбосидан қонундан ташқарида фойдаланиб келмоқдамиз. Янги эпоха бошлангач берилган катта ваъдалардан бири ҳам алифбо масаласини узил-кесил ҳал этиш бўлган. Ҳатто Ҳукумат ва Президент администрациясининг қўшма Ҳаракат режаси қабул қилинган. Унда хусусан, аниқ-тиниқ қилиб, Босма ва электрон оммавий ахборот воситаларининг лотин ёзувига асосланган ўзбек алифбосида фаолият юритиши, 2021 йилдан лотин ёзувига асосланган ўзбек алифбосига тўлиқ ўтиш таъминланиши ёзиб қўйилган. Шунгаям мана 2,5 йил бўпти. Бугун маълум бўлишича, яна битта Фармони олий қабул қилинипти. Унга кўра, Вазирлар Маҳкамаси 3 ой муддатда лотин ёзувига асосланган ўзбек алифбосига тўлиқ ўтишни таъминлаш мақсадида ишчи гуруҳ ташкил қилади ва аниқ чора-тадбирларни назарда тутувчи «Йўл харитаси» ишлаб чиқиб, Президент Администрациясига киритади. Биз алифбони ўзгартириши тўғрисида Қонун қабул қилганимиздан бери туркманлар ва озарлар алифбосини ўзгартириб бўлди. Қозоқлар алифбосини ўзгартиришини эълон қилганига 2 йил бўлди, келаси 2 йилликда жараённи тугаллашади. Биз эса келаси йилгача анову ишчи гуруҳининг "Йўл харитаси"ни кутамиз. Келаси октябргача эса бир гап бўлар, қолаверса уёғи янги сайловларга уланиб кетади.