Ижобий, айни пайтда ўйлантирадиган тенденция 2021 йилнинг ўтган уч ойида келиб тушган халқаро трансчегаравий пул ўтказмалари ҳажми 1,42 млрд.долларга етгани ва ўтган йилнинг тегишли даврига нисбатан 31 фоизга ошгани қайд этилмоқда. Албатта, бу жуда ижобий, тўлов балансини барқарорлаштирувчи муҳим сигнал. Пул ўтказмалари ҳажми тез тикланмоқда. Лекин ўтган 2020 йил дастлабки уч ойининг базаси коронавирус эпидемияси сабаб паст бўлганини ҳам эътиборга олиш лозим бўлади. Шу билан бирга чиқувчи, яъни Ўзбекистондан юборилган пул ўтказмалари ҳажми шиддат билан ортаётганига ҳам эътибор қаратиш керак. Чиқувчи ўтказмалар, кирувчига нисбатан тезроқ ўсмоқда, ўсиш суръати қарийб 43 фоизни ташкил этган. Умуман олганда Ўзбекистондан юборилаётган ўтказмалар ҳажмининг тезроқ ошиб бориш тенденцияси 2019 йилдан буён кузатилмоқда ва ҳали-ҳануз давом этмоқда. Бунда борган сари кучайиб бораётган протекционистик сиёсат оқибатида аслида товар ва хизматлар сотиб олиш билан боғлиқ операцияларнинг ўрни фақат ошиб бораётганини сезмаслик мумкин эмас.