Ғалати карантин давом этадими? Эртага, агар узайтирилмаса, 28 июндан кучга кирган карантин чекловлари бекор бўлиши керак. Ўтган йили мартдан буён турли кўринишда, қатъий, ҳудудий, рангли, ваҳимали тарзда эълон қилинган карантин чекловлари орасида мана шуниси жуда ғалати чиқди. Чунки унга деярли амал қилинмади. Тошкентга кириш вилоятлик автомашиналар учун чекланди, лекин қатнов давом этди. Умумий овқатланиш корхоналарининг соат 20:00гача ишлаши белгиланди, лекин аксар кафе ва ресторанлар гўёки ёпилгандек бўлиб, ичкарида ишлашни давом эттираверди. Биргина қувалик бечора шашликпазни айтмаса, ҳеч ким бу сафар "козел отпущения" қилинмади. Балки унда мантиқ йўқлиги учунми, балки бир қўли билан карантин чекловлари эълон қилганлар бошқа бир қўли билан оммавий тадбирларни гумбура-қасир давом эттиргани учунми. Унданам қизиғи, 5 июлда тўй тадбирларини ўтказиш билан боғлиқ янги чекловларнинг белгиланиши бўлди. Одатда чекловлар эълон қилингач, узоғи 2 кундан кейин кучга кирарди. Бу сафар тўй чекловлари оз эмас, кўп эмас 26 кундан кейин, яъни 1 августдан бошлаб кучга кириши белгиланди. Балки юртни, шаҳарни сўраётганлар июль ойида ўзлари оилавий тўй ва маросимлари белгилаб қўйганлари учун шундай бўлгандир. Ким билади дейсиз?! @the_bakiroo