ZF-UZ-VAC-2001 вакцинаси билан эмлаш тўхтатилдими? Бугун дўстларимиздан бири Тошкент шаҳридаги 1- поликлиникадан ZF-UZ-VAC-2001 вакцинасининг иккинчи дозасини олиш учун мурожаат қилган. Поликлиникада ўзбек-хитой вакцинаси билан эмлаш вақтинча тўхтатилгани маълум қилинган. Кейин дўстимиз Соғлиқни сақлаш вазирлиги 1003 рақамига боғланган. Вазирлик оператори махсус буйруқ билан ZF-UZ-VAC-2001 вакцинаси билан эмлаш бир, балки икки ҳафтага тўхтаганини билдириб, бу вакциналанганларни базада рўйхатга киритиш ва маълумотларни қайта ишлаш билан боғлиқлигини қайд этган (суҳбат аудиоёзуви мавжуд). Шундан сўнг ўзбек-хитой вакцинаси билан эмланиш истагидаги бошқа фойдаланувчилар ҳам вазирлик рақамидан худди шундай тарздаги жавобларни олаётгани маълум бўлган. Энди саволлар: Биринчидан, нега вазирлик ZF-UZ-VAC-2001 вакцинаси билан эмлаш тўхтатилганини очиқ эълон қилмаяпти? Минглаб фуқароларимиз ишдан, уйдан, фарзандидан ажралиб, рухсат олиб поликлиникага бориши ва бу хабарни ўша жойда эшитиши керакми? Ё ўзбек чиновниклари фуқароларни қийнаб, овора қилиб, ҳузур оладими? Иккинчидан, ZF-UZ-VAC-2001нинг иккинчи ва учинчи дозасини олмоқчи бўлган ҳамюртларимз нима қилсин? Айниқса бу хизмат кўрсатиш соҳасидаги ходимлар бўлса, улардан иш берувчилар ҳам, хусусан ресторанларда фаолият талаблари ҳам шуни талаб этаётган бўлса? Учинчидан, вакцина олганлар билан боғлиқ маълумотлар етказиш, қайта ишлаш билан боғлиқ чалкашликлар ва хаос аввал бошдан буён мавжуд (бу ҳақда ўзим бир неча марта ёздим). Базадаги маълумотларни тартибга келтириш учун вакциналашни тўхтатиш қайси ақлга сиғади? Наҳотки тепамизга чиқиб олганларнинг тақиқлаш, тўхтатиш ва сукут сақлашдан бошқа қўлидан келадиган чораси бўлмаса? @the_bakiroo