Ташқи савдо ўсмоқда, манфий сальдо ҳам 2021 йил январь-август ойларида экспорт 9 277,9 млн. долларни, импорт эса 15 685,8 млн.долларни ташкил этган. Салбий сальдо 6 407,9 млн.долларга етган. Бу бутун 2019 йилда ва бутун 2020 йилда қайд этилган максимум миқдорлардан кўпроқдир. Айтиш жоизки. салбий сальдонинг қарийб 43%и биз кириб кетишга тайёр бўлиб турган ЕОИИ ҳиссасига тўғри келади. ЕОИИ давлатларига экспортимиз (2 541,3 млн.доллар) ЕОИИ давлатларидан импортнинг (5 274,1 млн.доллар) ярмини ҳам ташкил этмайди. Энди тасаввур қилинг, иттифоққа кириб кетсак бизнинг ташқи савдо балансимиздаги мувозанат посангиси қай ҳолга келади?! Иттифоққа аъзолик Ўзбекистонда импорт жаннатини яратади, деган гаплар қуруқ хом-хаёл. Монополлашган автосаноат, электротехника ва озиқ-овқат соҳалари учун Ўзбекистон 5, балки 10 йиллаб алоҳида қоидаларни сақлаб қолади. Кремль бунга тайёр ҳам. Чунки унга очиқ бозорли Ўзбекистон эмас, сиёсий ноғораларга муқом тушиб ўйнайдиган Ўзбекистон керак. Гарчи келаси бешйиллик учун ЕОИИга кириш ё кирмаслик Ўзбекистоннинг тараққиёт омили ёки сиёсий мутелик сабабчиси бўлиши мумкин ҳисобланган воқелик бўлсада, бўлажак сайловларда курашга киришаётган номзодлар ЕОИИга нисбатан аниқ позицияларини очиқ-ойдин маълум қилишмаган.