Чиновниклар айланмаси ҳақида Сув табиатда суюқлик, буғ ва муз-қор шаклларида айланиб юргани сингари ўзбек чиновниклари ҳам бир лавозимдан иккинчисига доимий кўчиб юраверадилар. Кеча ташриф давомида лавозимидан озод қилинган ўн нафар раҳбар ҳам худди шундай лавозимлардан лавозимларга кўчиб, айланиб юрадиган шахслардир. Ҳокимликдан ишдан олинади, бошқа туманда замҳоким бўлади, яна бир муддат ўтиб яна ҳоким бўлади, яна ишдан олинади, бирор вилоят корхонасига раҳбар бўлади. Кучли канал топса, бирдан вазир ўринбосари ҳам бўлиб кетади. Ва ҳакозо. Исми ва фамилиясини кўрсатмаган ҳолда кеча ишдан олинган чиновниклардан бирининг лавозимдан лавозимга ўтиш хронологиясини кўрсатмоқчиман (бу хронологияни ҳар бир ўрта чиновникка қўллаш мумкин). 2016 йил. Вилоят Марказий банки раҳбари. 2017 йил. Республика банки раиси. 2018 йил. Вилоят ҳокимининг ўринбосари. 2019 йил. Агентлик директори. 2020 йил Вазир ўринбосари. 2021 йил. Вилоят ташкилоти раҳбари. 2022 йил. Кўп куттирмайди, янги лавозимга ўтказилади. Тўлиқ бўлмаган 6 йилда олтита лавозим.