Сиздан угина, биздан бугина - бу бузуқ принцип Давлатнинг қайсидир субъектга берган преференциялари, қўш-қўллаб топширган буюртмалари, қўллайдиган алоҳида имтиёзлари ва субъектнинг бунинг эвазига қайсидир эзгу топшириқларни бажариши ё бажараётгандек кўрсатиши - бу нормал, самарали шартнома эмас. Сиздан угина, биздан бугина - бу бузуқ принцип. Узр-куя, Коза ностра ва гангстерлар шунақа қоидаларда фаолият юритади. Мен черков қураяпман, мен спортга ёрдам бераяпман, мен очларга овқат тарқатаяпман, дея ўзининг криминал ҳаракатларини оқлашга уринади мафия. Узоқ йиллар ишлайди ҳам бу принциплар, токи жамият бу нотўғри эканини, тарақққиётга тўсиқ бўлганини ҳис қила бошламагунича. Ўн мингта уйсизни, ўн мингта оққонни яратадиган, имкониятлар тенгсизлиги тизими устига қурилган иррационал сиёсат бенефициарлари юзта уй тарқатиши ё юзта касални операция қилдириши билан ўзини оқлаши замонавий дунёда камида аҳлоқсизлик ҳисобланади. Иқтисодий ва ижтимоий зиёнкорликни майли қўя турайлик. Қонунларга қайтишимиз керак. Қанақадир криминал принциплар қоидаларга айланишидан тийилмасак аҳволимиз фақат оғирлашиб бораверади. @the_bakiroo