Ишсизлик ва инфляция - яқин орада Россия рўпара бўладиган энг асосий муаммолар бўлади Россиянинг тарк этишини эълон қилган 500дан ортиқ хорижий компанияларда дастлабки ҳисобларга кўра, 2 миллионга яқин ишчи ходимлар бўлган. Хорижий компанияларнинг ишчилари энг юқори ёки ўртачадан юқори миқдорда маош олувчилар тоифасига кирган. Гап шундаки, Россиядан кетаётган хорижий компанияларнинг россиялик ҳамкорлари, яъни етказиб берувчи ё хизмат кўрсатувчи субъектларнинг ҳисоби ва уларнинг ишчи ходимлари саноғига ҳали аниқлик киритилмаган. Бошқача айтганда, хорижий бизнеснинг тарк этишининг ишсизлик кўрсаткичларини оширишига бир неча босқичли таъсири бўлади. Очиғини айтиш керак, бу ишсизлик сегменти бизнинг меҳнат мигрантларимиз ишлаб келаётган сегментга тўғридан-тўғри боғлиқ эмас. Хорижий компаниялар ишчи ходимлари 100 000 рубль + сегментда, бизнинг мигрантларимиз эса ўртача 40-60 минг рубллик сегментда иш юритишади. Ишсизлик муаммоси маълум бир вақтгача, мигрантлар сегментига етиб келмайди. Ишсизлик энг аввало юқори ва ўрта даромадларга эга Россияликларни жазолашни бошлайди. Лекин бу йил россияликлар учун ишсизликдан ҳам ортиқ муаммо бу инфляция бўлади. Нефть ва газ соҳасини инобатга олмаса, Россияни тарк этаётган компаниялар энг йирик солиқ тўловчилар ҳисобланишган. Россиянинг федерал бюджети яқин йилларда кузатилмаган даромадлар камайишига ва харажатлар юкламасига дуч келади. Табиийки, бу эмиссия стимули ва инфляцион омилларни кучайтиради. Инфляцияни кучайишида номонетар омиллар биринчи ўринга чиқади. Турли ҳисобларга кўра март-апрель ойларида йиллик инфляция 20%гача, йил якунига бориб эса 50%гача чиқиши прогноз қилинмоқда. @the_bakiroo