Толиблар аёллар учун ҳижобни мажбурий деб эълон қилди Толиблар ҳукуматидаги Исломий эзгуликни тарғиб қилиш ва гуноҳлар олдини олиш вазирлиги ўтказган матбуот анжуманида аёлларнинг ҳижоб ўраши мажбурий деб эълон қилинди. Айтилишича, бу ҳақдаги фармойишни толибларнинг лидери Ҳайбатулло Охунзода имзолаган. Шунингдек, анжуманда аёллар муҳим зарурият бўлмаса кўчага чиқмаслиги лозимлиги таъкидланган. Толибларга кўра, аёлларнинг кўчага чиқмаслиги ҳижоб қоидаларининг энг маъқулидир. Аёлларнинг ҳижоб қоидаларига амал қилмагани учун эркаклар жазоланиши белгиланмоқда. Бу аёлнинг эри ёки бошқа вакили бўлиши мумкин. Қоидабузарлик биринчи марта рўй берганида эркакка ҳайфсан эълон қилинади, иккинчи мартасида эса уч кунлик қамоқ кўзда тутилган. Кейинги қоидабузарликлар жуда қаттиқ жазоланади, фақат бунда жазони шариат суди белгилайди.