Рецессия эҳтимоли олтин ва мис нархларини ярим йиллик минимумларгача қулатди. Нефть ҳам арзонламоқда, лекин бу олигархик Ўзбекистонга таалуқли эмас Қўшма штатлар, унинг ортидан дунё иқтисодиётининг рецессияга кириши эҳтимоллари тобора хавотирга солмоқда. Инвесторлар АҚШ ва Европа иқтисодиётининг яқин горизонтдаги истиқболларига ишонишмаяпти. Кеча фонд ва хом-ашё биржалари кунни қизил зонада ўтказди. Биз учун муҳим бўлган олтин 1 760 долларгача, мис эса 7 550 долларгача арзонлаган. Нефть котировкалари ҳам қуламоқда. Брент типидаги нефть минимумларда 102 долларгача арзонлаган Ўзбекистонда бу пайтда бензин нархи ошаётгани дунё бозоридан ва умуман бозордан узилганимизни яна бир бор кўрсатади. Нархларни ер ости бойликларини ва импорт каналларини эгаллаб олган очкўз олигархия назоратидаги монополиялар белгилаётгани учун ёқилғи арзонлашишини кутманг. Бутун дунё иқтисодчилари янги рецессиянинг оқибатларини баҳолашга, унинг кенглиги ва чуқурлигини чамалашга тушаётган шу кунларда биз ҳам эҳтимолий оқибатларни ўзимиз учун прогнозлаштиришга тайёргарлик кўриб қўйсак ёмон бўлмайди. Глобал инфляция ва уруш жароҳатлари ўз-ўзидан сўрилиб кетмайди.