Қарорлар халқ хоҳиш иродасидан кечикмаслиги керак 2016 сентябрдан 2019 йил декабргача давом этган давр, Янги дея таърифланадиган эпоханинг энг эркин қисми дея кўрилади. Шахсан мен бу кичик вақт оралиғини миллат ва мамлакат эркинлигининг чўққиси деб биламан. Ўтмишимизда, энг эркин дея кўрилган на 1917 йилда, на 1991 йилда бунчалар эркинлик кенглигига етиб борилган. Бунинг калити аввало кўп айтилган тўғридан-тўғри мулоқот (прямая демократия) билан боғлиқ бўлган бўлса, кейин иқтидорга келганларнинг Халқ истаетганидан ҳам кўпроқ янгиланишларга бора олгани, бунга мойиллиги билан тушунтирилиши керак назаримда. Кейин эса парламент сайловлари ва айниқса пандемия даврида қарор қабул қилувчиларнинг директивалари ва ҳаракат тезлиги Халқнинг иродаси ва истакларидан ортда қола бошлади, баъзида терс борди. 3 йиллик эркинлик эпкини Халқнинг ҳаддан зиёд юқори кутилмаларини яратишига туртки бера олди. Янги маъмурият, афсуски, ҳар доим ҳам бу эврилишларни ўзи вақтида сеза олгани йўқ. Тепада сезимлилик пасая боргани сари пастда юқорига нисбатан талабчанлик пасаяди, деб ўйланган бўлиши эҳтимол. Лекин бу юз бермади. Катта шаҳарларда, зиёлилар, бизнес, янги иқтисодиёт - медиа ва ИТ вакилларида ҳақ ва ҳуқуқлар бўйича дискуссиялар, қарашлар шаклланишда давом этди ва этмоқда. Тан олиш керак, бу янги тўқ қатламни илк йиллардаги ислоҳотлар натижалари яратди. Лекин уларни ҳозир ким эшитмоқда? Уларнинг вакиллиги борми? Мана шу саволлар очиқ қолмоқда ҳозирча. Демак, статус-кво мувозанатланиши учун иқтидордагилар яна vox populi'га етиб олишлари, балки кун тартибини белгилашда ўтиб кетишлари ҳам керак бўлади. @the_bakiroo