Азиз Ўзбекистонликлар, оталар, оналар, опалар, акалар, укалар, сингиллар Яна уч соатдан кейин сайловдаги танлов ва имкониятлар тўғрисида мурожаат эта олмайман. Мен ҳам худди сиз сингари бу йилги сайлов жараёнларида пассив иштирокчиман. Мен ҳам худди сиз сингари улуғ, лекин бахтсиз ватанимиз Ўзбекистонда туғилганман, ҳеч қаёққа кетгим йўқ, кетишни истамайман, фарзандларим келажагини ҳам шу юртда кўраман, қандай орзу қилсам шу замин билан боғлиқ. Яна бир кундан кейин биз, ҳаммамиз танлов қилишимиз лозим. Тўғри, бу танлов тўкис эмас. Лекин ҳозир шу чекланган танловда ўзимизнинг онгли, ҳисобли ва ақлли танловимизни амалга оширмасак, эртага - Орзудаги Ўзбекистонда ўзимиз истаган эркин танловга етиб бора олмаймиз. Энди қабул қилишимиз лозимки, Мамлакатда қарор қабул қилиш маркази бир киши эмас, Парламент бўлиши лозим. Вилоятларда ҳоким эмас - Кенгаш, туманларда ҳоким эмас - Кенгаш. Кўп орзу қилганимиз - ҳокимларни сайлашга ҳали бери етмаслигимиз энди аён, лекин бу тутуруғи, чегараси йўқ ҳокимларни тийиб қўйиши мумкин бўлган Кенгашни шакллантириш ҳали қўлимизда. Ҳокимларнинг талвасага, жонталашга тушаётгани бежизмас. Уларнинг шотири бўлмаган ҳар бир депутатнинг Кенгашларга ўтиши сиз-у, биз - солиқ тўловчиларнинг миллиардлаб маблағини бу тутуруқсизлар чўнтагига кириб кетишидан чеклаб қолади. 1991 йилдан буён илк марта имкониятларга имкониятлар бор. Балки бу охиргисидир. Балки охиргисимасдир. 2019 йил 22 декабрда сайлов участкаларида кўришгунча. Охиригача.