Навбатдаги баланд байроқ ётоқсиз талабалар ва боғланмасиз ҳайдовчилар учун руҳий компенсация учун бўлса керак Билмайман, сабабини тушунмайман, нега мамлакат қанча қашшоқ бўлса, ўша мамлакат чиновникларида баланд байроқ ўрнатишга иштиёқ шунча баланд? Битта бўлса, майли тушунасиз, иккита-учта бўлсаям чидаш мумкин. Лекин бу кимники узунроқ мусобақага айланиб кетган бўлса-чи? Вилоятлараро, энди туманлараро. Бу қанақа комплекс? Илдизлари қандай? Беруний метроси яқинида навбатдаги баланд байроқ ўрнатиларкан, кўча нақ бир ҳафтага ёпиларкан. Шу кўчадан ҳар куни минглаб талабалар ўтади. Ётоқхонасиз, ижарасиз, айримлари 30 кмдан, Сергелидаги ҳоким-тадбиркорнинг омборхоналаридан қатнайди. Лекин энди уларнинг кўз ўнгида баланд байроқ бўлади. Ётоқхона йўқ, лекин байроқ бор. Кўр, қувон, кемтикни тўлдир! Шундайми? Икки йилдан бери шу Беруний чорраҳасида боғлама қуриш ҳақида гап кетади. Оддий фуқароларга эмас, давлат раҳбарига камида уч марта презентация қилиб ваъда беришган ёлғончилар. Кунига минглаб, балки ўн минглаб автомобиль шу ердан марказга қараб юради. Энди улар ваъда қилинаётган, балки ажратилган ер аллақачон сотиб юборилган боғламани эмас, баланд байроқни кўради. Пробкада турганингда кўр, қувон, кемтикни тўлдир! Шундайми?