"Хусусийлаштирилган" Ўзсаноатқурилишбанкнинг эгаси битта бўлмайдиган кўринади (давлат кетмайди) Ҳарқалай янги қарор мундарижасидан шундай режа ва ҳаракатлар англашилади. Ўзбекистоннинг иккинчи банки, саноат, қазиб олиш ва қайта ишлаш бўйича энг йирик давлат лойиҳаларини молиялаштириб келган Ўзсаноатқурилишбанкдаги давлат улуши, агар яна муддатлар узаймаса, 1,5 йилдан кейин 50%дан тушиши керак. Бунда ХМК, ЕТТБ ва ОТБ каби халқаро молия институтларининг амалдаги ва бўлажак кредит линиялари банк акцияларига конвертация қилинади. Яъни қарз ва кредитлар ўрнига банк акциялари берилади. 2023 йил 1 июль ҳолатига банкнинг 4,6 трлн.сўмлик ёки 400 млн.доллар номиналдаги устав капитали мавжуд (жами капитали 8,2 трлн.сўм). Демак, акциялар конвертацияси нархини номиналда келишилган тақдирда ҳам камида 200 млн.долларлик кредит ва қарз линиялари акцияларга конвертация бўлиши керак. Шунда, айтайлик, портфель инвесторлар ўлароқ, ХМК, ЕТТБ ва ОТБ биргаликда 50 фоизгача акцияларга эга чиқишади. Лекин энг катта акциядор сифатида, балки 49 фоизгача акция эгаси давлат бўлиб қоладиган кўринади. Ҳозирда давлат ФРРУ (82,10%), Стратегик ислоҳотлар агентлиги (13,10%) ва Ўзтрансгаз (1,20%) орқали Ўзсаноатқурилишбанкни назорат қилади. Дарвоқе, Иқтисодиет ва молия вазирлиги Ўзсаноатқурилишбанкнинг 1,3 трлн.сўмлик қарзини субординар қарз сифатида қайта расмийлаштирмоқчи (банк капитали етарлилиги минимумга етиб келган ва шу орқали давлат яна банкнинг кредитлаш имкониятларини қувватламоқчи, яъни амалда банкдан кетмоқчи эмас). Таклиф этилган "хусусийлаштириш" схемасидан давлат (бюджет) бир сўм ҳам олмайди.