​Нефть нархлари тушмоқда, бензин арзонлашадими? Йўқ, яна бир бор йўқ. Охирги 2 ойдаги 98 долларга етган максимумларга нисбатан брент типидаги нефть котировкалари қарийб 20%га, 79,5 долларгача арзонлашди. Миллий ғуруримиз, ўзимизнинг нефть, газ конденсати ва алламбало шиптирлардан тайёрланадиган 80 бензинга нисбатан глобал нефть котировкаларининг мутлақо алоқаси йўқ деб олсак ҳам, 92 ва ундан юқори маркадаги бензинлар бозор қонунларига кўра арзонлашиши керак эди. Лекин, қайтанга қимматлашмоқда. Совет давридагидек дефицитга айланган 95 бензин нархи 1,5 долларга яқинлашмоқда. Улгуржи ва чакана тармоқ маржасини очофатларча кўпайтиришда давом этмоқда. Нега? Чунки бензин ишлаб чиқаришдан тортиб, импортигача монополистлар ва ўзаро келишув асосида иш юритаётганлар қўлида жамланган. Дефицитни ҳатто тан олишни ўзига эп кўрмайдиган Энергетика вазирлигидан ишора кутишдан маъно йўқ, Картелларга қарши курашиши керак бўлган Рақобат қўмитаси уларга ғинг дея оладими? Бензин импортидаги ва чакана савдодаги ўзаро тил бириктиришларни очиб ташлашга кучи ва ваколати борми? Шимолдаги империя нафақат газни, энди бензинни ҳам иқтисодиётимизни чўктириш учун энергетик қурол ўлароқ ишлата бошлаганини кимдир сеза бошладими?