Тадбиркорларга қимматбаҳо металларни қулай шаклда, бўлакларга бўлиб сотишга рухсат берилди Ўтган куни “Заргарлик буюмларини ишлаб чиқариш соҳасини янада ривожлантириш ва унинг рақобатбардошлигини таъминлаш чора-тадбирлари тўғрисида”ги фармони қабул қилинди. Фармон билан танишганлар июнь ойида заргарлик соҳасидаги тадбиркорлар билан ўтказилган учрашувда берилган таклифлар инобатга олинганини кўришлари мумкин. Унда тадбиркор қимматбаҳо металлар ишлаб чиқарувчилардан маҳсулотларни сотиб олиш жараёнини қулайлаштириш бўйича таклиф берган эди. Ҳужжатга кўра, 2024 йилнинг 1 сентябридан бошлаб қимматбаҳо металларни тадбиркорлар талабидан келиб чиқиб, 100 фоиз олдиндан тўлов қилган ҳолда сотиб олиш ҳамда бўлакларга бўлиб, қулай шакл ва миқдорга келтириб сотишга рухсат берилмоқда. Эртага, 26 июль куни Очиқ мулоқот арафасида соҳалар кесимида навбатдаги учрашув бўлиб ўтади. Унда электротехника ва автомобилсозлик соҳаларидаги мавжуд муаммолар ва уларнинг ечимлари бўйича таклифлар шакллантирилади. Соҳада фаолият кўрсатаётган тадбиркорлар учрашувда фаол иштирок этиб, ўзлари дуч келаётган муаммолар юзасидан тегишли вазирлик ва идоралар раҳбарларига тўғридан-тўғри мурожаат қилиш имкониятга эга бўлишади. Бу имкониятдан максимал фойдаланиш керак.