Қуёш панеллари импортига тақиқ кучга кирадими? 8 кундан кейин кучга кириши керак бўлган, лекин феълан осилиб қолган ўзгаришлардан бири қуёш панеллари билан боғлиқ. 2025 йил 1 январдан бошлаб BNEF Tier-1 рўйхатига кирмаган компаниялар томонидан ишлаб чиқарилган қуёш панеллари, инверторлар ва электр энергиясини сақлаш тизимларини импорт қилиш тақиқланиши белгиланган. Лекин бу тўғридаги 11 сентябрда имзоланган Фармон ҳали бирон жойда эълон қилинмаган. Фармондан кейин қонун ва қонуности актларига тегишли ўзгартиришлар киритилганиям номаълум. Шонли энергетикларнинг рақобатни ўлдириш орқали қайсидир тўда фойдасига ишлайдиган навбатдаги бузғунчи ташаббуси бўйича тадбиркорларнинг эътироз ва норозиликларини кимдир эшитдими, инобатга олдими, буям номаълум. Энг қизиғи, бундай шарманда тақиқ 2025 йилни "Атроф-муҳитни асраш ва яшил иқтисодиёт йили" деб эълон қилиниши фонида юз бермоқда. Энергетика вазирлиги бу яширинча киритилган ва расман очиқланмаган тақиқ бўйича ҳали бирон марта муносабат билдиргани йўқ. Рақобатни ўлдиришга ва қуёш панеллари импортини бир қўлли қилишга қаратилган навбатдаги бузғунчи тақиқ бўйича Адлия вазирлиги, Савдо саноат палатаси ва Рақобат қўмитасининг ҳам позицияси очиқланмаган.