Карталар сонини битта банкда 5 тагача, барча банкларда 20 тагача чеклаш қоидаси кун тартибидан олиндими? 2024 йилнинг охирги иш ҳафтаси бошланди. Лекин янги йилдан амал қилиши мўлжал қилинган бир қатор ўзгартиришлар ҳақида аниқлик йўқлигича қолмоқда. Шулардан бири жисмоний шахсларга карталар сонини вақтинчалик битта банкда 5 тагача, барча банкларда 20 тагача белгиланиши билан боғлиқ. Биринчидан, ҳалигача биз билмаймиз, қоидалар кучга киришидан олдин жисмоний шахсларга ўзларининг номига очилган карталар ҳақида, айтайлик, давлат хизматлари портали орқали тўлиқ ахборот олиш имконияти тақдим этиладими ёки йўқми? Ахир фирибгарликнинг илдизи фирибгарлар номимизга бизнинг хабаримизсиз карта очаётгани билан боғлиқ эмасми? Ўзи идеалда шундай ахборот олиш имкони яратилса, чекловларга ҳам зарурият қолмаган бўларди (худди масалан, UZIMEI рўйхатда ўтказиш учун ишлатилган шахсий ахборот бўйича ахборот олиш имкони бўлса, UZIMEI доирасида фирибгарликлар профилактикаси юзага келишидек). Иккинчидан, чекловлар ўтиш даври жорий қилинмасдан дабдурустдан жорий қилинса, бу аввал очилган карталарга тааллуқли бўладими ёки фақат қоидалар кучга кирган янги даврга? Буям ноаниқ. Учинчидан, айтайлик, чекловлар аввал очилган карталарга ҳам ишлатилса, 5/20 лимитидан ортиқ карталар қандай ўчирилади? Мажбурий тартибдами ёки ихтиёрий? Мажбурий тартибда бўлса, бу қандай ишлайди? Масалан, 30 та картаси бор мижознинг айнан қайси 10 та картаси ўчирилади? Биринчи 10тасими, охирги 10тасими? Ё исталган 10тасими?