Энергокризис январдаги иқтисодий ўсишни кескин секинлаштирган Январда йирик солиқ тўловчиларнинг солиқ тушумлари кескин қисқаргани ҳақида ёзган эдик. Солиқ тушумларининг қисқариши илдизлари тўхтамай авж олаётган энергокризис оқибатида иқтисодий ўсишнинг секинлашаётгани билан боғланади. 2024 январь билан солиштирганда саноат ишлаб чиқариш ўсиши 16,6%дан 4,3%гача, қурилиш ишлари ўсиши 24,5%дан 17,9%гача, хизматлар соҳаси ўсиши 16,8%дан 11,4%гача секинлашган. Расмий статистика электр, газ, буғ билан таъминлаш ва ҳавони кондициялаш саноатида 2,4% пасайишни, тайёр металл буюмлар ишлаб чиқариш 81,0%га, фармацевтика ва дори маҳсулотлари ишлаб чиқариш 97,9%гача қулаганини кўрсатган (яъни бу соҳалар амалда тўхтаб қолган). Албатта, 2024 йил январь учун 2023 йилнинг аномал январи базис ҳисобланади. Лекин 2025 йилда иқтисодий ўсиш ҳисобларида яширин иқтисодиёт кўрсаткичлари ҳам киритилаётганини инобатга олиш керак. Ҳозирги Ўзбекистонда иқтисодиётнинг асосий муаммоси бу энергокасофат. Энергокасофатдан халос бўлинмагунича иқтисодий ўсиш ҳам, даромадлар ўсиши ҳам, таркибий ўзгаришлар ҳам боши берк кўчага кириб қолаверади.