Микро ва кичик бизнесга кредит ажратиш манфаатли бўлади Охирги йилларда банклар корпоратив секторда асосан йирик бизнесни, айниқса давлат компанияларини кредитлашга муккасидан кетди. Аҳвол шу даражага етгандики, давлат банклари монополистлар ва давлат компанияларидан қолсагина, кейин кичик бизнесга кредит ажратишга ўтиб олишганди. Натижада, охирги беш йилда кичик ва ўрта бизнеснинг кредит портфелидаги улуши 40 фоиздан 28 фоизгача пасайиб кетган. Бу ҳолатни Давлат раҳбари ҳам қаттиқ танқид қилиб, кичик бизнес субъектлари ҳисобидан йирик лойиҳаларни молиялаштириш амалиётидан воз кечиш кераклигини айтганди. Ниҳоят, бу борада жиддий ўзгаришлар бўладиганга ўхшайди. 2025 йил 1 мартдан бошлаб микро ва кичик бизнес субъектларига ажратилган банк регулятив капитали 0,2 фоизидан ошмаган, бироқ энг кўпи билан 15 млрд. сўмгача кредитлар 75% рискка тортиладиган бўлаяпти. Шу пайтгача бу кредитлар кредитларнинг фоиз ставкасига қараб, 200%гача рискка тортиб келинган. Банкирлар тилидан содда тилга кўчирсак, энди банклар илгари мавжуд капитали билан микро ва кичик бизнесга 1 трлн.сўм кредит ажратган бўлса, энди шу капитали билан 2 баробар кўпроқ, 2 трлн.сўм кредит бера олишади. Яъни энди банклар учун микро ва кичик бизнесга кредит ажратиш бошқа корпоратив тоифаларга кредит ажратишдан кўра манфаатлироқ бўлади. Бу монополист ва йирик давлат корхоналарини кредитлашга муккасидан кетган давлат банклари учун ҳам, фақат чакана кредитлаш ёки мономаҳсулот билан ўралашиб қолган хусусий банклар учун ҳам яхши рағбатга айланади. Маълумот учун, Ўзбекистонда микробизнес сифатида айланмаси 1 млрд.сўмгача, кичик бизнес сифатида эса айланмаси 10 млрд.сўмгача бўлган тадбиркорлик субъектлари тушунилади.