Давлат банклари давлат компанияларини кредитлашни қачон қисқартиради? Тадбиркорлар билан ўтказилган учрашувда давлат банклари асосан давлат компаниялари ва йирик компанияларни кредитлаш билан машғул бўлиб қолгани жиддий танқид қилинган эди. Исталган давлат банки портфелини олсангиз, топ қарздорлари рўйхатида ҳаддан ташқари юқори кредит концентрациясига эга давлат компаниялари ёки улар билан боғланган пудратчи ва буюртмачи бенефициарларни кўрасиз. Афсуски, Давлат раҳбари танқид қилганидан кейин ҳам жиддий ўзгаришлар бошлангани ва юз бергани йўқ. Охирги ойлардаги корпоратив кредитлашнинг фаоллашгани яна давлат компаниялари ёки уларга дахлдор йирик лойиҳаларни молиялаштириш туфайли бўлиб қолмоқда. Яъни очиқ бозорни торайтирадиган, давлатдан/давлатга кўринишидаги самарасизлик схемаси - ёпиқ ҳалқа узиб ташлангани йўқ. Табиийки, давлат банклари давлат компаниялари ва уларга турли битимлар билан боғланган йирик компанияларни кредитлашда давом этаркан, кичик ва ўрта бизнесга ресурсларнинг қолдиқ принципи ишлатилади, кичик ва ўрта бизнес энг юқори фоизларда ва ноқулай шартларда кредитланиш мажбур бўлаверади. Давлат банкларининг хусусийлаштирилиши ёки уларни марказлашган ресурслардан маҳрум қилиниши яқин орада юз берадиган ҳодиса эмас, шундай экан, қанақадир минимал ўзгаришлар бўлиши учун балки "перезагрузка" керакдир, балки давлат банкларига янги қонларни қўшиш пайти келгандир?