Банклар капиталига берилган $4,5 млрднинг бозор қиймати қанча? Давлат банкларининг рентабеллиги ўта паст экани Давлат раҳбари томонидан танқид қилинган ўтган кунги йиғилишда банклар капитализацияси учун 4,5 млрд доллар йўналтирилгани қайд этиб ўтилди. Ҳар қандай иқтисодчи, банкир, инвестор қўйиши керак бўлган савол битта бўлиши керак: бугун ўша давлат банклар капиталига берган 4,5 млрд.долларнинг бозор қиймати қанча? Ярим нархига борадими ҳеч қурса? Соддароқ сўраганда, давлат 4,5 млрд.доллар тикворган банкларни бозорда 2 млрд долларга сота оламизми? 1 млрд.долларга-чи? Аввал ҳам кўп бора таъкидлаганимиздек, давлат банклари капиталига пул бериш бу пул ёқиш билан баб-баравар. Сиз пулингиз 3 минг долларга айланиб қолишини била туриб бизнесга 10 минг доллар тикасизми? Нега давлат тикиши керак? Яна солиқ тўловчиларнинг пулларини. Ўша капиталлашув ҳисобига каррасига ошди, дейилган кредит қўйилмалари ўлик лойиҳалар, аввалбошдан самарасизлиги ва қайтмаслиги аниқ бўла туриб молиялаштирилган лойиҳалар (уларнинг қиймати 16,5 трлн.сўм эмас, каррасига кўпроқ эканини йиғилишда очиқ айтишганми ёки йўқми, лекин буни ҳамма билади). Давлат банклари капиталига яна пул киритилиши шу ўлик активлар кўламини яна кенгайтиради холос. Демакки, давлат банкларининг ўзи паст нархини янада пасайтиради. Яна бир масала. Бўпти, давлат ўз чўнтагида агент ўлароқ сақлаб қоладиган банклар капиталига пул беришига кўз юмайлик дейлик. Лекин хусусийлаштирилиши эълон қилинган банклар капиталига нега давлат яна пул киритиши керак? Ахир Пойтахтбанк мисолида банк хусусийлаштирилаётгани учун бундан буёнги капиталлашув талаблари янги инвесторга қўйилади, деб эълон қилингандику. Нега принципли ва узвий бўлиш шунчалар қийин? Хусусийлаштирилаётган банкларга давлат яна пул киритишидан давлат ютқазади, бюджет ютқазади, ўзбекистонликлар ютқазади. Лекин ўша банкларга боғлаб боқилиши учун ўтказиб қўйилган тўртта чўнтак чиновник ютади, ютса.