Чакана кредитлаш суръати сустлигича қолмоқда Август ойида банкларнинг кредит қўйилмалари анча фаол 9,0 трлн.сўмдан кўпроққа ўсган ва 509,7 трлн.сўмга етган. Лекин кредит қолдиғининг ўсиши охирги даврда чакана кредитлаш ҳисобига рўй бераётгани йўқ. Ой давомидаги ўсишнинг фақат 2,9 трлн.сўмлик қисми чаканага тўғри келган. Ипотеканинг ўсиши яна секинлашган (+865 млрд.сўм). Негизини автокредитлар ташкил этувчи истеъмол кредитлари қолдиғи 332 млрд.сўмга қисқарган (учинчи ой кетма-кет). Чакана маҳсулотлардан асосан микроқарзлар фаол ўсмоқда (+1,7 трлн.сўм). Корпоратив кредитлар қолдиғи жуда юқори даражада, 6,1 трлн.сўмга кўпайган. Корпоратив кредитлашда юқори фаолликни давлат банклари яратмоқда. Марказлашган ресурслар ҳисобига маъмурий кредитлашда етакчилик қиладиган Миллийбанк, Ўзсаноатқурилишбанк ва Асака банкининг корпоратив портфели энг юқори даражада ўсмоқда. Ой давомида муаммоли кредитлар қолдиғи 710 млрд.сўмга ўсиб, 21,5 трлн.сўмдан ошган (NPL улуши 4,22%). Аксар давлат банкларида муаммоли кредитлар камайгани эътиборли. Муаммоли кредитлар қолдиғи ва улушининг ўсиши асосан битта банк Ипотека банк ҳисобига тўғри келган (+724 млрд.сўм). Можорлар назоратидаги банк охирги ойларда энг ёмон кредит портфелиги эга давлат банкига айланган БРБни ҳам ортда қолдирган.