Сентябрда кредитлаш яна секинлаша бошлаган Сентябрда икки ойлик фаол ўсишдан кейин банклар кредит қўйилмаларининг ўсиши бироз секинлашган. Ой давомида банкларнинг кредит портфели 5,9 трлн.сўмга ўсиб, 515,6 трлн.сўмга етган. Бунда чакана кредитлар қолдиғи 2,8 трлн.сўм, корпоратив кредитлар қолдиғи 3,1 трлн.сўмга кўпайган. Чакана кредитлар таркибида фақат микроқарзлар ўта фаол ўсмоқда (+1,7 трлн.сўм). Негизини автокредитлар ташкил этувчи истеъмол кредитлари қолдиғи тўртинчи ой кетма кет қисқаришда давом этган (-492 млрд.сўм). Микроқарзлар қолдиғи тез орада автокредитлар қолдиғини ортда қолдиради. Айрим банкларда микроқарзлар кредит портфелидаги ягона монамаҳсулот ҳисобланиши бу банклар учун етарлича хатарлар яратиши мумкин. Бир неча ойлик сустликдан кейин ипотека кредити қолдиғининг ўсиши сал тезлашган (+1,2 трлн.сўм). Сентябрда ҳам кредитлашда давлат бонкалари — Миллий банк (+717 млрд.сўм), Ўзсаноатқурилишбанк (+654 млрд.сўм) ва Микрокредитбанк (+631 млрд.сўм) фаол бўлишган. 1 октябрь ҳисобот санасига бўлгани учун, анъанага кўра, давлат банклари муаммоли кредитларни камроқ кўрсатишни уддалашган. Ёлғонга зарурият камроқ бўлган хусусий банкларда NPL ўсишда давом этган ва Ўзбекистон янги тарихида биринчи марта давлат банкларидаги муаммоли кредитлар улуши хусусий банклардаги муаммоли кредитлар улуши билан тенглашган. Албатта, бу давлат банкларининг кредит қўйилмалари сифатлироқ бўлиб қолганини англатмайди.