Автокредитлаш қисқармоқда, лекин... Октябрь ойида негизини автокредитлар ташкил этган истеъмол кредитлари қолдиғи атига 981 млрд.сўмга ўсган. Бу августдаги ўсиш ҳажмидан қарийб 1,9 трлн.сўм, сентябрдагидан эса 802 млрд.сўм камроқ. Бир қарашда автокредитлаш жиловлангандек. Лекин автокредитлаш тўлқини секинлашаётган шароитда микроқарз қолдиғини ўсиши бирдан тезлашиб кетган. Сентябрда микроқарз қолдиғи 806 млрд.сўмга ўсган бўлса, октябрда ўсиш 1 425 млрд.сўмга етган. Бир ой олдин автокредитлашни тийиб туриш бўйича чораларини айланиб ўтмоқчи бўлаётгган банклар ва уларнинг спекулянт мижозлари энди айнан микроқарз каналини кенгайтириш йўлидан боришаётгани ҳақида ёзган эдик. Октябрда банкларнинг кредит қўйилмалари жами 8,9 трлн.сўмга ошган ва 460,5 трлн.сўмга етган. Ўсишнинг 4,3 трлн.сўмини чакана кредитлар, 4,6 трлн.сўмини корпоратив кредитлар ташкил этган. Ипотека кредитларининг ўсиши бироз секинлашган (1 249 млрд.сўм). Оилавий тадбиркорлик учун кредитлар қолдиғи 2- ой кетма-кет қисқармоқда (-244 млрд.сўм). Корпоратив кредитлашнинг фаоллашиб қолгани йирик давлат банкларидаги маъмурий кредит лойиҳаларининг молиялаштирилиши билан боғлиқ. Муаммоли кредитларнинг расмий тан олинган қолдиғи деярли ўзгармаган (-51 млрд.сўм) ва 16,8 трлн.сўмлигича қолган, портфелга нисбатан NPL улуши 3,6% (-0,1%). Июль ва августда муаммоли кредитлари бирдан ўсиб кетган Ипотекабанкнинг аҳволи бирдан яхшиланишда давом этмоқда. Октябрда можорлар муаммоли кредитларни 602 млрд.сўмга камайтира олишгани ҳайратланарли (сентябрда можор қариндошлар 448 млрд.сўм муаммоли кредитни ортга қайтара олишганди). Бизнесни ривожлантириш банкига айланган собиқ ҚҚБда NPL 333 млрд.сўмга ошиб кетган. Бу бор реалликни қайд этиш билан боғлиқ бўлса ва кейинги ойгаёқ орқага қайтариб қўйилмаса, тўғри босилаётган қадам. Муаммоларнинг ечими уни тан олишдан бошланади.