"Давлат хизматчилари даромадини декларациялашга оид қонунни қабул қилиш вақти-соати келган!" Давлат раҳбари давлат хизматчилари даромадини декларациялашга оид қонунни қабул қилиш вақти-соати келганини таъкидлаган. Мутасаддиларга тез фурсатда ушбу қонун лойиҳасини жамоатчилик муҳокамасига қўйиб, 1 апрелгача киритиш топширилган. Айтиш керакки, Декларациялаш билан боғлиқ қонун 2017 йилдаёқ қабул қилиниши керак эди, даромадлари ва мол-мулкини мажбурий декларация қилиш тизими Президент фармонига кўра 2022 йил 1 январдан кучга кириши керак эди. Лекин турли поғоналардаги қаршиликлар, айрим амалдорларнинг бизнес манфаатлар билан қоришиб кетилгани туфайли турли важ-корсонлар билан бу вазифа пайсалга солиб келинмоқда. Шунингдек, Давлат раҳбари томонидан қонунчиликка ноқонуний бойлик орттириш ҳақида модда киритиш таклиф қилинди. Яъни, давлат хизматчиси декларация қилган даромадига мос келмайдиган мол-мулкини қаердан олганини исботлаши керак бўлади. Айтиш керакки, Ўзбекистон БМТнинг Коррупцияга қарши кураш конвенциясига қўшилган. Конвенциянинг 20-моддасида бундай дейилган: Ҳар бир иштирокчи Давлат, ўз конституцияси ва ҳуқуқий тизимининг энг муҳим принципларига риоя қилиш шартида, ноқонуний тарзда бойлик орттирилишини, яъни оммавий мансабдор шахс активлари унинг қонуний даромадларидан оқилона асосланиб берила олмайдиган даражада ошиб кетишини, қачонки улар атайин содир этилганда, буни жиноий жавобгарликка тортиладиган ҳаракат сифатида эътироф этиш учун талаб қилиниши мумкин бўлган қонуний ва бошқа чораларни кўриш имкониятини кўриб чиқади.