Олтин нархи ҳисобига захиралар ўсган қисми қимматли қоғозларга йўналтирилмоқда: ФРРУ активлари ҳалиям ёпиқ Апрелда Ўзбекистон халқаро захиралари 1,4 млрд.долларга ошиб, 49,3 млрд.долларга етган. Захираларнинг валюта қисми 616,9 млн.долларга кўпайган ва 1 май ҳолатига 11,0 млрд.долларни ташкил этган. Хусусан, қимматли қоғозлар портфели 500,8 млн.долларга кўпайтирилиб, 703,9 млн.долларга етказилган. Захиралардаги олтиннинг физик ҳажми 360 минг унцияга камайган (максимумларда, ишлаб чиқарилгани ҳисоби билан бирга, яна тахминан 700-750 минг унция олтин сотилган бўлиши мумкин). Олтин қимматлашишда давом этгани эвазига, олтин захираларининг пулдаги нисоби 772,6 млн.долларга кўпайиб, 37,7 млрд.долларга етган. Захиралар таркибидаги ФРРУнинг активлари очиқланиши таркибий ўзгаришларни, хусусан олтиннинг мисли кўрилмаган даражада қимматлашишидан қандай картина ҳосил бўлаётганини тўлиқ тасаввур қилишга имкон берарди. Афсуски, Ўзбекистон халқига тегишли, лекин халққа ёпиқ қозон ФРРУ активлари захираларнинг номаълум белгиси ўлароқ қолмоқда.