Қиммат олтин ҳисобига захираларимиз яна ошган, унинг таркибида қимматли қоғозлар пайдо бўлган Май ойи давомида Ўзбекистоннинг олтин-валюта захиралари 1 526,0 млн.долларга кўпайган ва 36 634,3 млн.долларга етган. Захираларимиз таркибида очиқ маълумотлар тарихида биринчи марта 35 млн.долларлик қимматли қоғозлар пайдо бўлган. Захираларнинг валюта қисми 1 244,9 млн.долларга ошиб, 9 266,6 млн.долларни ташкил этган. Ой давомида ишлаб чиқарувчилардан сотиб олингани билан биргаликда 400 минг унция атрофида олтин сотилгани эвазига захираларнинг олтин қисми физик ҳажмда 11,4 млн.унциягача қисқарган. Лекин пул қийматида 278,8 млн.долларга ошиб, 26 812,4 млн.долларга етган. S&P рейтинг агентлиги охирги ҳисоботида бюджетнинг бир қисмига айланиб кетган ФРРУ ташқи активларини ҳам Марказий банк олтин-валюта захиралари таркибида ҳисобланилаётганига эътироз билдирганди. Шунга қарамай, Регулятор ўз ҳисоботида захиралар ичида кўрсатилаётган ФРРУ активларини алоҳида кўрсатмаган. Олтин-валюта захиралари таркибида амалда фискал функцияларни бажараётган ФРРУ ташқи активлари камида 6 млрд.доллардан кўпроқни ташкил этади.