Захираларимиз олтин нархи ҳисобига ўсишда давом этмоқда Сентябрь ойи якунлари билан халқаро захираларимиз янги максимум 41 139,1 млн.долларга етган (+1 985,6 млн.доллар). Захираларнинг валюта қисми 518,3 млн.долларга кўпайган ва 8 709,6 млн.долларни ташкил этган. Захиралардаги олтиннинг физик ҳажми бироз қисқарган ва 12,02 млн.унциядан (-0,02) иборат бўлмоқда. Ишлаб чиқариш ҳажми инобатга олинса, ой давомида 300-350 минг унция ёки 790-920 млн.долларлик олтин сотилган бўлиши мумкин. Олтиннинг кескин қимматлашуви ҳисобига захиралардаги олтиннинг пулдаги қиймати 1 463,2 млн.долларга ошиб, 31 860,3 млн.долларга етган. Инобатга олиш лозимки, захираларимизнинг ошиши фақат олтиннинг қулай нархлари ҳисобига рўй бермоқда. Масалан, йил бошидаги олтин нархлари инобатга олинса (бу нархларгача олтиннинг пасайиши эҳтимолини соқит қилиб бўлмайди), захираларимиз камайишдан тўхтагани йўқ. Бунинг устига регулятор ўз ҳисоботида захиралар ичида кўрсатилаётган ФРРУ активларини алоҳидалаштирмасликда давом этмоқда. Олтин-валюта захиралари таркибида амалда фискал функцияларни бажараётган ФРРУ ташқи активларининг динамикаси реалликларни янада аниқлаштирган бўларди.