​ҚҚС тушумларининг юқори ўсиши бюджет даромадларини тезроқ ўстирган 2025 йилнинг биринчи ярим йиллигида Давлат бюджети даромадлари ўтган йилнинг шу даврига нисбатан 19,2%га ўсиб, 144,2 трлн.сўмни ташкил этган (ўтган йилнинг шу даврида ўсиш 18,3%ни ташкил этган). Бюджет даромадларининг ўсиши асосий оқимини ҚҚС тушумларининг ўсиши таъминлаган (35,9 трлн.сўм, ўсиш 34,4%). ҚҚСнинг қайтарилиши динамикаси келтирилмаган. Айланмадан солиқ тушумлари 23,1%га ўсган (1,6 трлн.сўм). Яъни бизнес фаол солиқ тўлашда давом этмоқда. Бошқа даромадлар 24,7%га ўсган (29,3 трлн.сўм). Лекин унинг таркиби очилмаган (ичида дивидендлар, хусусийлаштириш тушумлари, жарималар ўтиради). Ресурс солиқлари ичида энг паст ўсиш ер қаъридан фойдаланганлик учун солиқлар бўйича қайд этилган (10,3 трлн.сўм, 11,9%). Ер ости бойликларимиз бўйича олигархларга берилган имтиёзлар ва пасайтирилган ставкаларнинг умуман самараси бўлмаганини яна бир бора такрорлаш керак. Ўзбек халқига тегишли ер ости бойликлари бенефициарлигини яна ўзбек халқига қайтармас эканмиз, бу борада ҳеч нима ўзгармайди.