Ўзбекистонда исломий банклар учун лицензиялаш жорий этилади Қонунчилик палатаси исломий банк тўғрисидаги қонун лойиҳасини кўриб чиққан. Лойиҳани Марказий банк раиси ўринбосари Аброрхўжа Турдалиев тақдим этган (1:48:00 дан кўриш мумкин). Лойиҳага кўра, Ўзбекистонда исломий банк фаолиятини амалга ошириш ҳуқуқини берувчи лицензия жорий этилади. Мазкур лицензия билан тўлақонли исломий банк сифатида фаолият кўрсатиш ёки мавжуд анъанавий банкларда исломий дарча яратиш мумкин бўлади. Маърузачи исломий молия тизими ва стандартларини шакллантириш учун зарурий инфратузилма ва институционал асослардан иборат комплекс ёндашув лозимлигини таъкидлаган. Қонун лойиҳаси билан бир нечта қонун ва кодексларга ўзгартириш ва қўшимчалар киритилиши белгиланган. Лойиҳа биринчи ўқишда маъқулланган (матни эълон қилинишини кутиб қоламиз).