Таклиф этилмаган "Вертолет пуллари"ни рад этаётганлар ҳақида Карантин вақтида аҳолига пулли ёрдам ҳақида гап кетдими, буни исталган воситалар билан рад этишга уринишлар одатга айланди. Пропаганда томонидан рад этиш учун энг кўп қўлланилаётган усул - бу ўзи аслида ҳеч ким таклиф этмаган воситани мисол келтира туриб, ўшани ноқислигини исботлаш. Масалан, мана бу ерда "вертолет пулларининг тарқатилиши" қанчалар зиёнлигини яна бир марта исботлашга уринишган. Мартдан буён нормал иқтисодчи ё эксперт Ўзбекистонда аҳолига пулли ёрдам кўрсатиш ҳақида тўхталганида бирон марта сочиладиган вертолет пуллари ҳақида гапиргани йўқ. Ҳарқалай бу ҳақда Беҳзод Ҳошимов гапиргани йўқ, Давлетовўз гапиргани йўқ, Юсупов гапиргани йўқ ва хусусан мен ҳам. Ҳусусан мен, тўрт ой аввал аёлларга, ишсиз ёки ишини йўқотган фарзандли аёлларга ёрдам кўрсатиш ҳақида, бунинг маъмурчилиги учун ортиқча харажат талаб этилмаслиги ҳақида ёзгандим. Ҳалиям шу позициядаман. Такрорлайман - бу пропаганда ва унга хизмат қилувчилар миянгизни захарлаётганидек вертолет пуллари эмас.