ДХШ қонунига swiss challenge механизми киритилади Ташаббускорларнинг қайд этишича, 2023–2024-йилларда амалга оширилган 80% дан ортиқ хусусий ташаббус асосидаги лойиҳаларда Swiss Challenge механизмининг йўқлиги бошқа иштирокчиларни жалб этиш имкониятини чеклаган. Лойиҳага кўра, Swiss challenge механизми орқали хусусий ташаббускор ДХШ лойиҳаси концепциясини ишлаб чиқиш ва потенциал давлат шеригига тақдим этиш ҳуқуқига эга. Давлат шериги концепцияни олгандан сўнг 30 календарь кун ичида уни маъқуллаш, рад этиш ёки маромига етказиш учун қайтариш бўйича қарор қабул қилади. Агар концепция тасдиқланса, потенциал давлат шериги лойиҳани амалга оширишдан манфаатдор талабгорларни аниқлаш учун қизиқиш билдириш сўровини эълон қилиши назарда тутилади. Агар белгиланган малака талабларига жавоб берадиган талабгорлардан бирортаси лойиҳага қизиқиш билдирса, хусусий шерикни аниқлаш тендер асосида амалга оширилади. Агар эса қизиқиш билдириш сўрови эълон қилинганидан кейин 30 календар кун ичида ҳеч қандай талабгор чиқмаса, потенциал давлат шериги хусусий ташаббускор билан тўғридан-тўғри музокараларга ўтиши мумкин бўлади.