UzTest тугатилади, сертификатлаш ислоҳоти ўтказилади Бугун Ўзбекистонда экспортчи ва импортчилар, умуман олганда ташқи ва ички бозорда ишлаётган барча тадбиркорларнинг байрами десаям бўлади. Ниҳоят, монополист ва олигархиянинг қўлидаги уртўқмоққа айланган UzTest тугатилади (1, 2, 3…). Қанийди, тугатилишдан олдин охирги йилларда Ўзбекистон иқтисодиётига етказган зиён ва жароҳатлари ўрганилиб, люстрация ҳам қилинса. Кеча Давлат раҳбарининг сертификатлаш тизимини ислоҳ қилиш ва бозор назоратига ўтиш бўйича ўтказган йиғилишида тадбиркорлар ҳам иштирок этишган. Давлат раҳбари амалдаги сертификатлаштириш тизими маҳсулот таннархининг ошишига олиб келаётганини, бюрократия ва коррупция учун замин яратаётганини таъкидлаган. Эндиликда хавф-хатарларни таҳлил қилишга асосланган бозор назорати тизими қўлланади. Бунда ишлаб чиқарувчи товарнинг стандартларга мувофиқлигини ўзи декларация қилади ва унинг сифати ҳамда хавфсизлиги учун тўлиқ жавобгарликни ўз зиммасига олади. Шу муносабат билан давлат назоратидан босқичма-босқич воз кечиш ва бозор назорати механизмларига ўтиш режалаштирилган. Бунинг учун “Бозор назорати тўғрисида”ги алоҳида қонун лойиҳаси тайёрланган. Йиғилишдан кейин тадбиркорларнинг билдирган фикрлари: Зафар Ҳошимов: “Мен жуда катта умиддаман, бугунги тақдимот якунлари бўйича ушбу қарорларни қабул қилсак, айтаманки, бу саноат учун конвертация очилганидек катта аҳамиятли қадам деб биламан”. Музаффар Разаков: “Давлат халақит бермайдиган ва зарар етказмайдиган назорат тизимини яратади, сифатни эса бозорнинг ўзи тартибга солади”.