Газ қазиб олиш қисқариши янада тезлашган Кетма-кет узатилаётган шонли рапортларга (1, 2, 3) қарамай, газ қазиб олиш қисқариши янада тезлашган. Статқўмга кўра, январь ойида 3,7 млрд.куб газ қазиб олинган, бу 2025 йил январдагидан 300 млн.куб кам. Қизиғи, расмий статистика 2025 йил январь кўрсаткичларини яна ўзгартирган. Аввалроқ 2024 йил кўрсаткичларидан олиб ташланган 3,3 млрд.куб газ газ қўшиб ёзилганмиди ёки бу хатоликмиди, деган савол очиқ қолганди. Шунингдек, расмий статистикага кўра 2025 йилда 42,3 млрд.куб газ қазиб олингани кўрсатилган бўлса, Тасдиқланган Стратегияда 41,7 млрд.куб газ қазиб олингани қайд этилган. Газ қазиб олиш ҳажмлари бўйича 2024 ва 2025 йилдаги улкан ўпқон фарқлар юзасидан нафақат статқўм, Энергетика вазирлиги, нефть ва газ бўйича ўринбосари лавозими жорий этилган Иқтисодиёт ва молия вазирлиги ҳам бирон изоҳ ёки тушунтириш бермаган. Январда, газдан ташқари яна нефть (-1,0 минг тонна) ва газ конденсати (-16,3 минг тонна) қазиб олиш ҳам қулашда давом этган.