Бу мантиқ билан туғилганлик гувоҳномаси ва кадастр ҳужжатларини ҳам ҳар 5 йилда янгилаш мумкин Техпаспортнинг ҳар 5 йилда алмаштириш заруриятини ID карта ва паспортнинг даврий равишда алмаштириш билан менгзаб ва инвентаризация важлари контекстида оқлашипти. Биринчидан, ҳатто ҳар 10 йилда бир алмаштириладиган ID карта ва паспортнинг алмаштирилиши ҳужжатда сурати жойлаштирилган шахснинг ташқи биологик кўриниши ўзгариши билан боғлиқ. Техпаспортда эса автомобиль эгасининг сурати йўқ (агар техпаспортга сурат ҳам жойлаштирилса, яна бир абсурд бўларди). Айрим давлатлар эса аллақачон жисмоний техпаспортдан воз кечиб муддатсиз электрон техпаспортларга ўтмоқда. Иккинчидан, автомобиль агрегатлари инвентаризацияси учун нормал ва соғлом дунё техник кўрик воситасидан фойдаланади. Эсинглардами, бу хизматни хусусий секторга ўтказган эдинглар. Учинчидан, сизларнинг келтираётган мантиғингиз бўйича туғилганлик, никоҳ, ўлим гувоҳномалариям ҳар 5 йилда алмаштирилиши керак. Диплом ва Кадастр гувоҳномалари ҳам яна. Яхшиям, бу соҳаларга ҳали етиб келмадинглар, яхшиям, замонавий ва технологик раҳбарлар етовида бу ҳужжатларни расмийлаштириш электрон шаклларга ўтказиб бўлинди ёки рақамлаштирилди (идеалда ўзи техпаспортниям шу истиқбол кутиши керак эди). Тўртинчидан, техпаспортни ҳар 5 йилда алмаштириш учун, сукут сақлаб турилганига қараганда, рўйхатдан ўтказиш учун тўлов каби 6,84 БҲМ (2 818 080 сўм) тўланадиган кўринади. Ўзи асл мақсад шу пулни қўшимча ундиришдамасми? Бешинчидан, асослар ва далилларни манфаатдор томонлардан эмас, Адлия вазирлигидан эшитсак бўларди. Ҳартугул, мувофиқлик бўйича ва ҳуқуқий саволлар Адлия вазирлигига қўйилмоқда.