Варламовнинг видеосини кўриб, бир фикр келиб қолди. Биламан, ҳаммага ҳам ёқмаса керак. Лекин Ўзбекистонда ҳам енгил автомобилларнинг тарихини юритиш керак. Чунки кўпчилик иккиламчи бозордан автомобил харид қилганда алдовга учрайди. “Суяги бутун”, “краска емаган” каби ёлғон сифатлар билан йўлларда ағнаб кетган машиналар ҳам яхшигина пулга сотиб юборилади. Иккиламчи автобозор эса жуда катта. Шу қадар каттаки, ташқаридан келадиган рақобатчиларини «фалаж» қилиб бўлган миллий автосаноатимиз мутасаддилари аллақачон иккиламчи бозорни ўзининг асосий рақобатчиси сифатида кўрмоқда ва иккиламчи бозордан харид қилинган автолар учун ҳам беҳад катта божлар ўрнатилишига эришган. Чунки автомашиналарнинг 90 фоизи иккиламчи бозорда олди-сотди бўлади. Бундай нопок тизимда фуқаролар алданиб қолмаслиги, ёлғон маълумотларни бартараф этиш учун тўғри ва ҳалол ишлаш тизимига ўтишимиз керак бўлади, албатта. ‼️ Бунинг учун энг аввало ДЙҲХХ ҳар бир автомобил тарихини юритиши керак бўлади. Базага ДЙҲХХ, устахоналар ва суғурта компанияларда «доступ» бўлади. Янги автомобил салондан харид қилингандан (ёки чет элдан чегарани кесиб ўтгандан) бошлаб: ▪️ Ўзгарган ҳар бир эгаси; ▪️ Автомобилнинг ўзи ва уни бошқарадиган ҳайдовчилар суғурталангани, суғурта муддати; ▪️ Ўзгарган давлат авто рақами; ▪️ Ўзгарган агрегат рақамлари; ▪️ Автомобилда қанақа қоидабузарликлар содир этилгани; ▪️ Автомобилнинг йўл-транспорт ҳодисаларида (аварияларда) иштироки (фотоси билан); ▪️ Автомобилларга суғурта ҳолати юзага келгани учун неча марта ва қанча суғурта суммаси тўлангани қайд этиб борилиши керак Шунингдек, автомобилларга техник хизмат кўрсатиш ва уларни созлаш устахоналарида ҳам шикаст етган автомобилларнинг фотоси, уларнинг устага келтирилган ва тузатилган санаси билан ДЙҲХХнинг умумий базасида қайд этиб бориш тизимини мажбурий тарзда йўлга қўйиш керак. Буни самарали йўлга қўйиш учун ЙТҲда аварияга учраган, энг билинмас тарзда пачоқ бўлиб, устахонага тузатишга йўл олган автонинг ҳам давлат рақами авария жойига энг биринчи бўлиб етиб келган ДЙҲХХ инспектори томонидан далолатнома расмийлаштириб, ечиб олиниши шарт, ҳолат базада дарҳол қайд этилиши керак (ҳозир ҳамма ГАИнинг қўлида планшет бор). Ўрнига устахонага тақдим этиш учун ГАИдан қандайдир қоғоз берилиши керак. Устахона шу қоғозсиз автомобилни таъмирлашга қабул қилмаслиги керак. Сўнгра, тузатиш ҳақида қайдлар устахона томонидан базада рисоладагидек қайд этилгач, текшириб кўрилиб, авторақам қайтариб берилиши керак. (Албатта, машиналарни яширинча тузатадиган уста ва устахоналар қатъий жазоланиши керак). Буларнинг барчаси қийинчиликсиз амалга оширса бўладиган иш. Қолаверса, ҳайдовчиларда авария қилмасликка интилиш, шошмасдан ҳайдашга ҳам рағбат уйғотади. Чунки машинасининг барчаси «сир»лари ошкор бўлади ва нархи аниқ тушади. Буни амалга ошириш учун ҳалоллик, ишга виждонан ёндашиш, ДЙҲХХ ва устахоналар томонидан коррупция унсурларини аралаштирмаслик керак бўлади, холос. Россияда шундай базалар аллақачон фаолият кўрсатмоқда экан. Нима деб ўйлайсизлар, Ўзбекистонда ҳам шу ишни эплаб бўладими-йўқми? Ёки урилган машиналарни янги эгаларига алдаб сотаверган маъқулми? 👉 @shokirjonov