Апрелда "10 ёшдан ошган" 24 минг дона автомобиль сотилганми? Иқтисодий тадқиқотлар ва ислоҳотлар марказига кўра, апрель ойида иккиламчи бозорда 43,7 минг дона автомобиль сотилган (бу мартдагидан 3,8 минг минг, ўтган йил апрелдагидан 8,3 минг дона кам). Марказ иккиламчи бозорда сотилган автомобилларнинг қўшимча характеристикасига ойдинлик киритмаган. Сал аввалроқ, Марказий банк апрель ойида эскроу ҳисобварақлари орқали (банк ва нотариус орқали) қарийб 19,7 минг дона автомобиль сотилгани ҳақида маълум қилганди. 1 апрелдан “10 ёшдан ошмаган” автомобиллар олди-сотдисида ҳисоб-китобларни нақдсиз шаклда амалга ошириш тартиби кучга кирган. Юқоридаги расмий рақамлардан келиб чиқсак, ўтган апрель ойида 24 минг дона "10 ёшдан ошган" автомобиллар сотилгани аён бўлади. Ўзи автомобиль бозорида рақобат ўлдирилган ва монополлаштирилган Ўзбекистонда автомобилларнинг иккиламчи бозори ҳаддан ташқари юқори аҳамият касб этади. Шу даражадаки, тижорат банкларида ҳалигача фойдаланилган автомобиллар учун автокредитлар янги автомобиллар учун ажратилган автокредитлардан кўпроқни ташкил этади, бутун бошли банкларнинг қийшиқ бизнес модели фақат шунинг устига қурилган (Республика ҳудудлари бўйлаб ўнминглаб қарзи тўланмай қайтарилган автомобиллар мозористони пайдо бўлган), шунингдек, иккиламчи бозордаги нарх тенденциялари монополистнинг нарх сиёсатига ҳам таъсир ўтказади.