Автомобилларни йирик узелли ишлаб чиқаришга имтиёзлар бериш тўхтатилиши керак Импортни аждарҳо божлар ва бошқа нотариф чекловлар билан бўғиб, "маҳаллийлаштириш", аслида ғилдирагини қўлда қотиришдан иборат йирик узелли ишлаб чиқариш автосаноатда янги даврнинг энг кенг тарқалган саволли бизнес моделларидан бирига айланган. Ўтган кунги йиғилишда номлари келтирилган қайси "завод"ни ёки брендни олманг, шу схемада иш бошлаган ёки фаолиятини давом эттиришмоқда. Бу схеманинг марказида маржани утилизация йиғими, солиқ ва бож имтиёзлари орқали ўзлаштириш туради. Ўзбекистонда янги даврда имтиёзлар олиш ва ўзлаштириш бўйича автомобилсозлик соҳаси энергетикадан қолишмайди (агар шу маҳаллийлаштирувчи, аслида қип-қизил импортчи бўлган заводларга берилган ёпиқ имтиёзлар эълон қилинганида, энергетиклар ҳам бошини чангаллаб қолишарди). Шундай экан, Ўзбекистонда Volkswagen автомобилларини "ишлаб чиқариш" лойиҳаси "кираётганига" эмас, қайтадан тирилтирилаётганига (аввалги сафарги уриниш ҳақида бу ерда ўқинг) истеъмолчилар учун қизиқ танлов ёки рақобатнинг пайдо бўлиши (қандай қилиб, бозордаги сегментлар ўзаро келишилган ва отаси бир компаниялар рақобатчи бўлади?) деб қарамаслик керак. Қайтанга, жамоатчилик, ОАВ ва бозор иштирокчилари бу каби кэптив лойиҳаларга солиқ, божхона ва утилизация йиғимидан имтиёз беришни тўхтатишни сўрашлари, шаффофликни талаб қилишлари лозим.