Хавотирларга соладиган имтиёз Аввал ҳам ёзганмиз бу ҳақда, Ўзбекистонда электромобиллар ишлаб чиқарилиши истиқболлари фақат бозорнинг яна тақа-тақ ёпилиши билан боғлиқ хавотирлар яратади. Кечаги йиғилишда ишлаб чиқариш жараёни тўлиқ йўлга қўйилгунча инвесторларга муайян миқдордаги электромобилларни имтиёзли шартлар асосида олиб киришга рухсат бериш билан боғлиқ янграган тезис бу хавотирларни янада реаллаштиради. Бюрократия тилидан халқ тилига ўгирилса, бу худди Uzauto/Uzautomotors АЖ тарафидан Chevrolet, Volkswagen/Skoda, ADM Jizzakh МЧЖ/Roodell МЧЖ тарафидан KIА, Chery ва Renault русумидаги ички ёнув двигателли импорт автомобилларини махфий қарор асосида божларсиз олиб кириб сотиш каби режимнинг электромобиллар импортига ҳам тадбиқ этилиши бўлади. Яъни, электромобиль ишлаб чиқариш баҳонасида электромобиль импорти ҳам тўлиқ бир қўлли ёки икки қўлли назоратга ўтади. Амалда истеъмолчи учун электромобиль сотиб олиш қимматлашади, танловсизлик эса ортади. Худди Хитойда ишлаб чиқарилган tracker 2'ни 1,5 баробар қимматига олишга мажбур бўлишимиз реаллигини юзага келади. Агар ҳукумат ростанам ниятлари самимий бўлса, тор гуруҳлар учун имтиёз яратмай, электромобиль билан боғлиқ нотариф чекловларни барча учун бекор қилиши, яъни имкониятларни бирхиллаштириши зарур. Ҳозирда электромобиль импортида энг катта чеклов бу - ўзбекистонлик йилига биттадан ортиқ электромобиль олиб кира олмаслиги билан боғлиқ. Бунинг учун мувофиқлик сертификати деган ўйлаб топилган бало тўсқинлик қилади. Яъни ўзбекистонлик иккинчи электромобилни олиб кирмоқчи бўлса, унга мувофиқлик сертификати берилмайди, демакки, божхона режимидан чиқарилмайди. Кеча янграган имтиёз эса электромобиль импорти назорати секин-аста тор манфаатлар гуруҳига ўтиб кетиши рискларини реаллаштиради. Шўрпешоналик тақдиримизга ёзилган кўринади.