Яна давлат банклари кредитлашда ўта фаол ва бу албатта ёмон Октябрда кредитлаш фаоллиги янада ортган. Ой давомидаа кредит қўйилмалари 3,3%га ўсиб, 375,3 трлн.сўмга етган. Эътиборлиси, кредит фаоллигининг деярли 90%ини ўша эски замонларда бўлгани каби риск чегараси йўқ давлат банклари таъминламоқда. Яъни фаоллик бозор конъюнктураси билан эмас, директив, бюрократик ва маъмурий каналлар орқали шаклланмоқда. Маҳсулотлар қирқимида қараганда чакана кредит бозорининг ўсиши тўхтаб қолгани йўқ, лекин таркиб ўзгармоқда. Октябрда истеъмол кредитлари ўсиши (асосан автокредитлар) ҳатто ипотека кредитлари ўсишини ҳам ортда қолдирган. Айни вақтда таълим кредитлари қолдиғи 619 млрд.сўмга ошган ва 1,5 трлн.сўмга етган. Ёмон сигнал шуки, мундарижаси ёлғон, пора, ўғирлик ва кўзбўямачиликдан иборат оилавий тадбиркорликка берилаётган кредитлар ажратиш деярли 2 баробар юқори тезлик олган (+498 млрд.сўм). Ўзбекистон бу касалликдан энди бошқа қутулмайди. Расмий кўрсаткичларга кўра ой давомида NPL 968 млрд. сўмга ёки жами портфелга нисбатан 4,30%гача (-0,41%) камайгани қайд этилаёган бўлсада, бу ҳатто Туркистонбанк ва Хайтекбанк маълумотларини чегириб ташлаганда ҳам алдамчи кўрсаткич. Чунки аввало NPL нисобини фаол кредитлаш ювиб юбораётган бўлса, давлат банкларида муаммоли кредитларни кўрсатиш шаффофлиги устидан назорат яна сусайиб кетган. Жуда кўп негатив тенденциялар қатори кредит қўйилмаларининг соғломлиги учун реал ҳаракатлар ўрнини манипуляциялар эгаллай бошлаган.