Март ойида кредитлаш фаоллашган Март ойи давомида банкларнинг кредит қўйилмалари 10,5 трлн.сўмга ёки 2,6%га ошган ва 408,2 трлн.сўмни ташкил этган. Чакана секторда негизини автокредитлар ташкил этувчи истеъмол кредитлари (+1,7 трлн.сўм) ва микроқарзлар (+1,0 трлн.сўм) жуда тез ўсмоқда. Ипотека ажратиш (+883 млрд.сўм) бироз фаоллашган бўлсада, ҳали авжига чиққани йўқ. Бир муддатли танаффусдан кейин оилавий тадбиркорликка имтиёзли кредитлар ажратиш яна бошланган (+517 млрд. сўм). Ўзбекистон банк тизими бу балодан қутуладиганга ўхшамайди. Корпоратив кредитлар 6,3 трлн.сўмга ошган, шунинг 6,1 трлн.сўми бевосита бизнесга таалуқли. Лекин корпоратив кредитлашнинг деярли 70%и тўртта давлат банки Миллий банк (+1 448 млрд.сўм), Агробанк (+1444 млрд.сўм), Саноатқурилишбанк (+788 млрд.сўм) ва Асакабанк (+526 млрд.сўм) ҳисобига тўғри келмоқда. Яъни катта эҳтимол, корпоратив кредитлаш асосан давлат дастурлари ва маъмурий кредитлашга оид бўлган. Муаммоли кредитлар қолдиғи 710 млрд.сўмга, 14,3 трлн.сўмгача, NPL даражаси эса 3,5% (-0,3%)гача пасайган. Муаммоли кредитларнинг қанча қисми амалда сўндирилиши, қанчаси шартларни қайта кўриб чиқиш ва яна қачаси "списание" ҳисобига экани номаълум. Кейинги вақтда охирги иккитасининг улуши ортиб бораётгандек. Марказий банк ахборотлар очиқлиги ва бозор иштирокчилари қарор қабул қилувчи сигналлар олиши учун шартлари қайта кўриб чиқилган ва балансдан ташқарига чиқарилган ("списание" қилинган) кредитлар бўйича ҳам маҳсулотлар қирқимида маълумотлар бериб борилишини йўлга қўйса бўларди.